ՄԻԺԻ-ի հիմնադիր և առաջին նախագահ` Արմինէ ԱՌԱՔԵԼԵԱՆ

Արմինէ Առաքելեանը ծնվել է 21.03.1962-ին Թեհրան քաղաքում (Իրան): Նա  քաղաքագետ և միջազգային իրավաբան է, ու նաև մարդու իրավունքների ու քաղաքացիական ակտիվիստ է: ՄԻԺԻ-ի հիմնադիրն է:

Արմինէն ուն իերկու MA և DESS կոչումներ այդ բնագավառներում Սորբոն-Փարիզ I-ի և Ռընե Դեքարտի համալսարաններից (Փարիզ, Ֆրանսիա): Նա ավելի քան 20 տարվա փորձառություն ունի` որպես մասնագետ և ակտիվիստ, մարդու իրավունքների պաշտպանության ու զարգացման, մարդասիրական, միջազգային զարգացման, ժողովրդավարության, պետականաշինության և քաղաքացիական հասարակության զարգացման, քաղաքացիական կրթության գործընթացների, գենդերային հարցերի բնագավառներում` ոչ կառավարական կազմակերպություններում և միջազգային միջկառավարական կազմակերպություններում: Նա աշխատել է Ժնևում և Աֆրիկայի Մեծ Լճերի շրջանում, ՄԱԿ-ի փախստականների գծով բարձրագույն հանձնակատարի (UNHCR) գլխավոր գրասենյակում՝ որպես իրավաբան և ավագ խորհրդական` կազմակերպության քաղաքականության և ծրագրերի գծով: Աշխատել է International IDEA (Ժողովրդավարության և ընտրությունների աջակցման միջազգային ինստիտուտ` ԺԸԱՄԻ) միջկառավարական կազմակերպությունում որպես Արևելյան Եվրոպայի և Հարավային Կովկասի ծրագրերի ղեկավար, և հետո իբրև ԺԸԱՄԻ-ի հայաստանյան դիվանագիտական գրասենյակի ղեկավար և լիազոր ներկայացուցիչ: Համագործակցել է Եվրամիության և Մարդու իրավունքների բնագավառում ՄԱԿ-ի բարձրագույն հանձնակատարի հետ Ռուանդայում (Աֆրիկա) 1994թ-ի ապրիլյան ցեղասպանությանը հաջորդող երեք տարիներին՝ որպես Մարդու իրավունքների զարգացման բաժնի գլխավոր պատասխանատու: Իսկ մոտ անցյալում Ժնևում այդ կազմակերպության հետ աշխատակցել է ռազմավարական փորձագիտական և խորհրդատվական իմաստով մարդու իրավունքների պաշտպանության ազգային և միջազգային գործունեության արդյունավետությունը զարգացնելու համար:

1999թ-ին իր ինքնուրույն միջոցներով և իմացությամբ նա հիմնադրել է Մարդու իրավունքների և ժողովրդավարության ինստիտուտ` ՄԻԺԻ անկախ ոչ կառավարական կազմակերպությունը Հայաստանում և կազմակերպության նախագահն է եղել 1999թ-ի օգոստոսից մինչև 2006թ. ապրիլը` կամավոր հիմունքներով: Արմինէ Առաքելեանը շարունակում է մնալ ՄԻԺԻ-ի հիմնադիրը և պատվո անդամը` կամավոր հիմունքներով: Նա այդ հանգամանքով ակտիվորեն նեցուկ է կանգնում ու խթանում է ՄԻժԻ-ին և նրա ղեկավարությանը` կենսագործելու ՄԻԺԻ-ի առաքելությունն ու նպատակները համաձայն և հավատարիմ կազմակերպության հիմնադիր սկզբունքներին ու աշխարհայացքին:

Արմինէ Առաքելեանը շարունակում է իր կամավոր աշխատանքը քաղաքացիական և մարդու իրավունքների Հայաստանյան, հայկական համազգային և համամարդկային ցանցերում և շարժումներում: